اعمل بيعة
تضيف المنتجات، تختار طريقة الدفع، وتطبع الإيصال
اعمل بيعة
البيع كله من شاشة "نقطة البيع" (/pos)، والنت مش شرط: البيعة بتتسجل على جهازك وتترفع لوحدها لما النت يرجع.
خطوة بخطوة
1. ضيف المنتجات
- بالبحث: اكتب اسم المنتج ودوس عليه
- من التصنيفات: اختار التصنيف، ودوس على المنتج
- بالباركود: دوس على زرار الباركود ووجّه الكاميرا، أو امسح بسكانر USB أو بلوتوث. لو الباركود متسجل على منتج، المنتج بيتضاف للفاتورة على طول. ولو مش متسجل، الرقم بيتكتب في خانة البحث
لو دوست على منتج موجود في الفاتورة أو مسحته تاني، الكمية بتزيد 1.
2. ظبّط الكمية
- بـ +/-، أو اكتب الرقم
- 0 بيشيل المنتج من الفاتورة
- تغيير السعر بإيدك للمدير (ADMIN) بس
3. ملاحظات (لو محتاج)
دوس على "أضف ملاحظة جديدة..." واكتب ملاحظتك، زي "لفّه هدية". تقدر تكتب أكتر من ملاحظة.
4. الشحن وبيانات العميل (لو توصيل)
- في المحل: سيب "الشحن" صفر، ومش محتاج بيانات العميل
- توصيل: اكتب مبلغ الشحن. أول ما يبقى أكبر من صفر، الطلب بيبقى "توصيل"، ولازم تكتب بيانات العميل (الاسم، التليفون، العنوان). لو دفعت من غيرها هتلاقي "بيانات العميل مطلوبة"
بيانات العميل بتكتبها في "معلومات العميل" جوه الكارت:
- عميل متسجل: اكتب رقم تليفونه، وهتظهرلك العملاء اللي رقمهم شبهه. اختاره من القايمة والاسم والعنوان بيتكتبوا لوحدهم. لو كتبتله عنوان جديد، بيتحفظ على حسابه.
- عميل جديد: اكتب رقمه واسمه (والعنوان لو توصيل) وكمّل البيعة عادي. مكيال بيسجّله في الحسابات لوحده مع الفاتورة، ومش محتاج تسجّله الأول.
ملحوظة: أقل شحن 10 ج.م. لو كتبت أقل من كده (وأكتر من صفر)، الدفع مش هيكمل وهتلاقي "أقل قيمة شحن".
5. ادفع
دوس على زرار الدفع واختار طريقة الدفع.
طرق الدفع
كاش
- اكتب المبلغ اللي الزبون ادّاهولك
- "الباقي" بيظهر قدامك وإنت بتكتب
- زرار التأكيد مش هيشتغل غير لما المبلغ يبقى قد الإجمالي أو أكتر
كارت
- المبلغ كله بيتسجل مدفوع
- اكتب الرقم المرجعي اللي طالع من ماكينة الكارت
- زرار التأكيد مش هيشتغل من غير الرقم المرجعي
آجل
- العميل اللي كتبته في الكارت بيظهر لوحده، وتقدر تغيّره بعميل تاني من الحسابات المسجلة
- عميل جديد؟ اكتب اسمه ورقمه في الكارت قبل ما تدوس دفع، وهيتسجل في الحسابات مع الفاتورة
- مفيش فلوس بتدخل دلوقتي، والفاتورة بتتسجل "غير مدفوع" على حساب العميل
- زرار التأكيد مش هيشتغل غير لما يبقى فيه عميل له رقم تليفون
خلّص البيعة
كل طريقة دفع فيها زرارين: "تأكيد" و**"تأكيد و طباعة"**. الطباعة بتفتح شاشة الطباعة بتاعة المتصفح على الإيصال، ومش محتاج تظبط طابعة في مكيال.
بعد التأكيد، الفاتورة بتتقفل، وتظهر رسالة إن البيعة تمت، وتبقى جاهز للزبون اللي بعده.
حالة الفاتورة بتتحدد لوحدها
| الحالة | إمتى |
|---|---|
| النوع: في المحل | الشحن صفر |
| النوع: توصيل | الشحن أكبر من صفر |
| الحالة: تم التوصيل | لطلبات "في المحل" |
| الحالة: جاري التوصيل | لطلبات "التوصيل" |
| الدفع: مدفوع | كاش أو كارت |
| الدفع: غير مدفوع | آجل |
الفواتير اللي اتعملت
من القايمة الجانبية، دوس على "مبيعات". هتلاقي كل الفواتير: الرقم، النوع، التاريخ، الإجمالي، طريقة الدفع، اسم العميل، والحالة.
كل الحالات
حالة الطلب
| الحالة | معناها |
|---|---|
| قيد التحضير | بتختارها بإيدك بس من التعديل |
| جاري التوصيل | طلب التوصيل أول ما يتعمل |
| تم التوصيل | طلب "في المحل" أول ما يتعمل |
| جاري الإرجاع | بتختارها بإيدك لما المرتجع يبدأ |
| تم الإرجاع | بتختارها بإيدك لما المرتجع يخلص |
حالة الدفع
| الحالة | معناها |
|---|---|
| غير مدفوع | لسه متدفعش (آجل) |
| مدفوع | اتدفع كله |
| مسترد | الفلوس رجعت للزبون |
مفيش "إلغاء" للفاتورة. عايز تلغي؟ شيل المنتجات من الفاتورة قبل الدفع. بعد الدفع، تقدر تغيّر الحالة بس.
تعدّل فاتورة
من "مبيعات"، افتح الفاتورة وغيّر:
- حالة الطلب: أي حالة من الخمسة اللي فوق
- حالة الدفع: مدفوع / غير مدفوع / مسترد. و"غير مدفوع" للفواتير الآجل بس
غير كده مفيش حاجة بتتعدّل: لا المنتجات، ولا الكمية، ولا طريقة الدفع، ولا بيانات العميل.
رسايل الأخطاء
"بيانات العميل مطلوبة"
كتبت شحن أكبر من صفر، ومكتبتش بيانات العميل كاملة (الاسم، التليفون، العنوان).
"أقل قيمة شحن"
الشحن أقل من 10 ج.م. خليه صفر (في المحل) أو 10 وأكتر (توصيل).
الفاتورة متعملتش
لو النت فاصل، البيعة بتتسجل على جهازك وتترفع بعدين، فالرسالة غالباً بسبب بيانات ناقصة في الفاتورة. راجعها وجرّب تاني.
نصايح
راجع الإجمالي والشحن قبل الدفع - الشحن بتكتبه بإيدك
امسح الباركود - أسرع وأدق من البحث
بيع آجل؟ - اكتب اسم العميل ورقمه في الكارت، سواء متسجل أو جديد
مرتجع أو توصيل خلص؟ - غيّر حالة الفاتورة من "مبيعات"